FEMÍNISTAGLEÐI Á ALÞJÓÐLEGUM BARÁTTUDEGI KVENNA

Í tilefni af alþjóðlegum baráttudegi kvenna, 8. mars, efnir femínistafélagið Bríet til baráttugleði á Barnum (Laugavegi 22) kl. 20:00. Kvöldið verður pakkfullt af baráttuþrungnum þrumuræðum, tónlist og skemmtilegheitum.

Í fyrra sveif andi fyrri tíma kvenréttindakvenna yfir vötnum, en nú mun póllinn færast yfir til nútímalegs og fjölbreytilegs femínisma. Húsið opnar 19:30 og hefst á kvenlegri spurningakeppni (kokteilakvissi) í umsjá kvenskörunganna Silju Báru Ómarsdóttur, Höllu Gunnarsdóttur og Auðar Alfífu kl. 20:00 stundvíslega. Mælst er til að femínistar mæti tímanlega. Auk þess munu stíga á stokk skúrkurinn eða hetjan Sóley Tómasdóttir, hin ljúfsára Ólöf Arnalds, leikkonan og langsokkurinn Ilmur Kristjánsdóttir, karlafemínistarnir Hjálmar og Gísli og fleiri.  

Þó svo miklu hafi verið áorkað er ekki hægt að tala um að algjöru jafnrétti kynjanna hafi verið náð. Því er meiningin að fylla fólk baráttuanda og fagna margbreytileika femínismans. Þannig ætlum við að taka þrjú skref fram á við í jafnréttisbaráttunni næstkomandi fimmtudagskvöld. 

Sameinumst í skemmtun á alþjóðlegum baráttudegi kvenna, fimmtudaginn 8. mars, á efri hæð Barsins (22) kl. 20:00 og fram á rauða femínistanótt. Ekki láta þennan viðburð fram hjá þér fara. 

Nánari upplýsingar gefa:Hólmfríður Anna Baldursdóttir s. 695 3680,Kristbjörg Kristjánsdóttir s. 691 2006.

Til kvenna

Konur í sögunni

6 mars

1886 - "The Nightingale" kemur út, en það var fyrsta tímaritið fyrir hjúkrunarkonur í USA.

1960 - Konur fá að kjósa í bæjarstjórnarkosningum í Sviss.

 

Fæddar þennan dag:

1806 - Elizabeth Barrett Browning. Enskt skáld, pólítískur hugsuður og feministi.

1937 - Valentina Tereshkova, sovéskur stjarnfræðingur og fyrsta konan til að fara út í geim.

1944 - Kiri Te Kanawa, óperusöngkona frá Nýja Sjálandi.

 

 

8.mars í Ráðhúsi Reykjavíkur

Alþjóðlegur baráttudagur kvenna 
fyrir friði og jafnrétti.

Opinn fundur fimmtudaginn 8.mars 2007 kl.17
í Tjarnarsal Ráðhúss Reykjavíkur.

Virkjum kraft kvenna.

Fundarstjóri: Halldóra Friðjónsdóttir, formaður BHM

Harpa Njálsdóttir, félagsfræðingur
Hvað þarf til að rétta hlut fátækra kvenna?

Ezter Toth, í stjórn Samtaka kvenna af erlendum uppruna 
Friður og jafnrétti á heimilum. 

Halldóra Malín Pétursdóttir, leikkona - atriði úr einleiknum “Power of Love”.

Guðríður Ólafsdóttir, félagsmálafulltrúi Öryrkjabandalags Íslands 
Jöfnun tækifæra.

Gunnar Hersveinn, heimspekingur
Friðarmenning.

Tónlist: Áshildur Haraldsdóttir, flautuleikari

María Kristjánsdóttir, leikstjóri
Frelsi til að vera fátækur.

Pálína Björk Matthíasdóttir 
Grameen-banki. 

Ljóðalestur: Guðrún Hannesdóttir, handhafi Ljóðstafs Jóns úr Vör 2007.

María S. Gunnarsdóttir, form. Menningar- og friðarsamtaka MFÍK 
Jöfnuður - jafnrétti – jafnræði.


Harpa Stefánsdóttir og Ármann Hákon Gunnarsson sýna ljósmyndir í salnum.

VEÐURFAR

V E Ð U R F A R  Í  Á S M U N D A R S A L   O G   G R Y F J U  
Verið velkomin á opnun! 

 

Laugardaginn 3. mars klukkan 15.00 opnar Guðrún Kristjánsdóttir sýninguna 
V E Ð U R F A R  í Ásmundarsal og Gryfju Listasafns ASÍ.
Sýningin stendur til 25. mars.

Sunnudaginn 11. mars kl. 15.00 ræðir Guðrún um verk sín og leiðir gesti um sýninguna.  

Guðrún Kristjánsdóttir hefur um árabil fágað og dýpkað nálgun og sýn á landslagsmyndina, bæði í málverkum sínum og öðrum miðlum.   Kannski má enn líta á málverkin sem ítarlegustu úrvinnsluna þar sem fletirnir spila við olíulit og striga en Guðrún vinnur jöfnum höndum í þrykk, myndbönd og flytur verkið beint á vegg eða rúðu, með málningu eða útskorinni fólíu. 

Á sýningunni V E Ð U R F A R  beitir Guðrún öllum þessum aðferðum til að teikna fram umlykjandi mynd, eins konar umhverfi, þar sem   áhorfandanum er sökkt inn í veröld veðurskrifaðra forma og hugleiðinga um umhleypingar, birtu og skuggaspil. Áhorfandinn er kallaður inn í veðraheim sem er mjög heimilislegur og hversdagslegur Íslendingum.

Listasafn ASÍ er við Freyjugötu 41, 101 Reykjavík. Það er opið alla daga nema mánudaga frá kl. 13.00-17.00. Aðgangur er ókeypis.  

Með kærri kveðju,  Listasafn ASÍ og Guðrún Kristjánsdóttir www.gudrun.is  

Paris og Tyra!

The Happy Theater kynnir
ÍSMERICA -TAKE THE TOUR WITH PARIS AND TYRA!

Gleðileikhúsið er nýstofnað atvinnuleikhús sem ákvað að tefla saman
þeim Paris Hilton og Tyru Banks. Útkoman er klukkutíma sýning þar sem
þær stöllur leiða áhorfendur út í óvissuna. Mæting er í andyri Kramhússins á
Bergstaðastræti.

Aukasýningar:
Laug .3 mars.kl.20:30
Laug. 10.mars. 20:30

Miðasala í síma 5510343 og miðinn kostar aðeins 1500 kr.

Kveðja,
The Happy Theater
Aðalbjörg og Magnea

ÁVARP Á ALÞJÓÐLEGUM BARÁTTUDEGI KVENNA

SAMEINUÐU ÞJÓÐIRNAR         

U N I T E D   N A T I O N S              

N A T I O N S   U N I ES

                              
                                                       

FRAMKVÆMDASTJÓRINN 
ÁVARP Á ALÞJÓÐLEGUM BARÁTTUDEGI KVENNA  
8. mars 2007          

Mér er það í senn ánægja og heiður að senda ykkur mínar bestu kveðjur á Alþjóðlegum baráttudegi kvenna – þeim fyrsta frá því ég tók við starfi framkvæmdastjóra Sameinuðu þjóðanna. Ég vona að á næstu árum eigið þið eftir að líta á mig sem fulltrúa ykkar og bandamann.           

Þessi dagur er tækifæri fyrir okkur öll, konur og karla, til að sameinast um málefni sem snertir allt mannkynið. .Valdefling kvenna er ekki markmið í sjálfu sér. Hún er skilyrði fyrir því að bæta líf allra jarðarbúa.             

Enginn getur efast um þessar staðreyndir. Og enginn getur andmælt þeirri niðurstöðu leiðtoganna á Alheimsleiðtogafundinum 2005 að jafnrétti kynjanna og mannréttindi allra eru forsendur þess að efla þróun, frið og öryggi.             

Samt sem áður er langur vegur frá því að almenn viðurkenning í orði skili sér í verki.. Í nánast hverju einasta landi eru færri konur en karlar í ákvarðanatökustöðum. Starf kvenna er enn vanmetið, illa launað eða ólaunað. Meirihluti þeirra hundrað milljóna barna sem ekki njóta neinnar skólagöngu eru stúlkur. Meirihluti þeirra meir en átta hundruð milljóna sem eru ólæsar, eru konur.  

Það sem er verst af öllu er, að ofbeldi gegn konum og stúlkum heldur áfram af fullum krafti á hverju meginlandi, í hverju landi og í hverjum menningarheimi. Það veldur miklum skaða í lífi kvenna, lífi fjölskyldna þeirra og í samfélaginu í heild.Flest samfélög banna slíkt ofbeldi en satt að segja er alltof oft litið framhjá því eða það látið viðgangast.  

Einmitt þess vegna er Alþjóðlegur baráttudagur kvenna svo mikilvægur sem raun ber vitni. Hann er áminning um þá ábyrgð okkar allra að vinna að varanlegri breytingu á gildismati og atferli. Hann er hvatning til okkar um að taka höndum saman: ríkisstjórnir, alþjóðasamtök, borgaralegt samfélag og einkageirinn. Við erum brýnd til að umbreyta samskiptum kvenna og karla á öllum stigum samfélagisns.

Okkur er lögð sú skylda á herðar að styrkja hvers kyns valdeflingu kvenna og stúlkna, allt frá menntun til smáfjármálastarfsemi. Sameinuðu þjóðirnar eiga að vera í fararbroddi í þessum aðgerðum.

Ég heiti því að gera allt sem í mínu valdi stendur til að svo megi verða, ekki aðeins á Alþjóðlegum baráttudegi kvenna, heldur alla daga. Ég hlakka til að starfa með ykkur að þessu sameiginlega markmiði.  

Ban Ki-moon

Alþjóðlegur réttindadagur kvenna

Um allan heim verða ýmsar uppákomur, s.s. tónleikar, ráðstefnur og fundir um stöðu kvenna. Hér er brot af því sem gert verður í tilefni dagsins:

Austurríki - Galakvöld.

Ástralía - kvennasamtök bjóða upp á opin míkrafónn allan daginn.

Bretland - göngutúr um austur London og saga kvenna þar á 19.öld sögð.

Chile - konur dreifa blómum til karla með miða sem á stendur: ,,Saman berjumst við fyrir réttindum kvenna."

Kanada - viðskiptakonur halda þögult uppboð, snittur og kokteill.

Malasya - tískusýning, naglasnyrting og hárgreiðsla.

Moldavía - ýmsar uppákomur þar sem vakin er athygli á því sem snertir konur sérstaklega s.s. ,,heilsa", ,,frami", ,,mansal."

Tansanía - konur í íþróttum, ávinningur kvenna af íþróttum og leikjum.

- af vef international women´s day. 

Konur eru að gera það - útúm allt!

Það er að koma mynd á þessa skemmtilegu daga framundan.

Gjörningar, leiksýningar, upplestrar, söngur, femínískt tilfinningatorg, fundir, ráðstefnur, námskeið, mótorhjólagellur og kynningar.  Endilega fylgist með.  Dagskrá skýrist næstu daga!

Byltingin nær líka til Köben!

8. mars í Kaupmannahöfn.

Í tilefni af alþjóðlegum baráttudegi kvenna 8. mars ætla feministar í Kaupmannahöfn að hittast í Jónshúsi kl.18.00 og ræða málin.

Rósa Erlingsdóttir stjórnmálafræðingur mun flytja fyrirlestur sem nefnist
"Ég myndi kjósa hana þótt hún væri karlmaður." Um kosningabaráttu og kjör Vigdísar Finnbogadóttur.
og
Gunnhildur Kristjánsdóttir, mastersnemi í stjórnmálafræði mun tala um Kvennalistann.
Yfir léttum veitingum munum við svo færa okkur til nútímans og spjalla um væntanlegan
hlut kvenna í næstu kosningum o.fl.

Endilega áframsendið þetta til allra sem þið þekkið í Danmörku og ef þið eigið leið um
Kaupmannahöfn þá væri gaman ef þið létuð sjá ykkur.

Baráttukveðjur,

Rósa Erlingsdóttir, Gunnhildur Kristjánsdóttir og Guðrún Ágústsdóttir